心经广本唱诵

按这里下载mp3

广本心经梵文唱颂 (11分34秒 )

Evaṃ mayā śrutam | ekasmin samaye bhagavān rājagṛhe viharati sma gṛdhrakūṭe parvate mahatā bhikṣusaṃghena sārdhaṃ mahatā ca bodhisattvasaṃghena | tena khalu samayena bhagavān¹ gambhīrâvasaṃbodhaṃ² nāma samādhiṃ³ samāpannaḥ⁴ | tena ca samayena āryāvalokiteśvaro bodhisattvo mahāsattvo gamhīrāyāṃ prajñāpāramitāyāṃ caryāṃ⁵ caramāṇaḥ⁶ evaṃ vyavalokayati sma | pañca skandhāṃstāṃś ca svabhāvaśūnyaṃ vyavalokayati ||

athâyuṣmān⁷ śāriputro buddhānubhāvena āryāvalokiteśvaraṃ bodhisattvam mahāsattvam etad avocat⁸ – yaḥ kaścit kulpaputro gambhīrāyāṃ prajñāpāramitāyāṃ caryāṃ cartukāmaḥ⁹, kathaṃ śikṣitavyaḥ¹⁰? Evam ukta āryāvalokiteśvaro bodhisattvo mahāsattvaḥ āyuṣmantaṃ¹¹ śāriputram etad avocat – yaḥ kaścic chāriputro kulaputro vā kuladuhitā¹² vā gambhīrāyāṃ prajñāpāramitāyāṃ caryāṃ cartukāmas, tenaivaṃ vyavalokitavyam – pañca skandhāṃstāṃś ca svabhāvaśūnyān samanupaśyati sma | rūpaṃ śūnyatā, śūnyataiva rūpam | rūpān na pṛthak śūnyatā, śūnyatāyā na pṛthag rūpam | yad rūpaṃ sā śūnyatā, yā śūnyatā tad rūpam |

evaṃ vedanāsaṃjñāsaṃskāravijñānāni ca śūnyatā | evaṃ śāriputra sarvadharmāḥ śūnyatālakṣaṇā anutpannā aniruddhā amalā avimalā anūnā¹³ asaṃpūrṇāḥ¹⁴ |

tasmāt tarhi śāriputra śūnyatāyāṃ na rūpaṃ, na vedanā, na saṃjñā, na saṃskārāḥ, na vijñānam, na cakṣur na śrotraṃ na ghrāṇaṃ na jihvā na kāyo na mano na rūpaṃ na śabdo na gandho na raso na spraṣṭavyaṃ na dharmaḥ |

na cakṣurdhātur yāvan na manodhātur na dharmadhātur na manovijñānadhātuḥ | na vidyā nâvidyā na kṣayo yāvan na jarāmaraṇaṃ na jarāmaraṇakṣayaḥ,

na duḥkhasamudayanirodhamārgā na jñānaṃ na prāptir nâprāptiḥ |

tasmāc chāriputra aprāptitvena bodhisattvānāṃ prajñāpāramitā āśritya¹⁵ viharati cittāvaraṇaḥ |

cittāvaraṇanāstitvād atrasto¹⁶ viparyāsātikrānto¹⁷ niṣṭhanirvāṇaḥ¹⁸ |

tryadhvavyavasthitāḥ sarvabuddhāḥ¹⁹ prajñāpāramitām āśritya anuttarāṃ samyaksaṃbodhim abhisaṃbuddhāḥ | jñātavyaḥ²⁰ prajñāpāramitāmahāmantro mahāvidyāmantro ‘nuttaramantro ‘samasama²¹mantraḥ sarvaduḥkhapraśamana²²mantraḥ satyamamithyatvāt²³ prajñāpāramitāyāmukto²⁴ mantraḥ |

tadyathā – gate gate pāragate pārasaṃgate bodhi svāhā |

evaṃ śāriputra gambhīrāyāṃ prajñāpāramitāyāṃ caryāyāṃ śikṣitavyaṃ bodhisattvena ||

atha khalu bhagavān tasmāt samādher vyutthāya²⁵ āryāvalokiteśvarasya bodhisattvasya mahāsattvasya sādhukāramadāt²⁶ – sādhu sādhu kulaputra | evam etat kulaputra, evam etad gambhīrāvāṃ prajñāpāramitāvāṃ caryaṃ cartavyaṃ yathā tvayā nirdiṣṭam anumodyate sarvatathāgatair arhadbhiḥ samyaksaṃbuddhaiḥ ||

idam avocad bhagavān | ānandamanā āyuṣmāñ chāriputraḥ āryāvalokiteśvaraś ca bodhisattvaḥ mahāsattvaḥ sā ca sarvāvatī pariṣat sadevamānuṣāsuragandharvaś ca loko bhagavato bhāṣitam abhyanandan ||

iti prajñāpāramitāhṛdayasūtraṃ samāptam (hṛdayasūtraṃ samāptam)|